კახეთის რეგიონში თვითიზოლაციაში მყოფი ადამიანების რიცხვი 283 -მდე გაიზარდა, ხოლო საკარანტინო სივრცეში 133 მოქალაქე რჩება. ამის შესახებ დაავადებათა კონტროლისა და საზოგადოებრივი ჯანმრთელობის ეროვნული ცენტრის კახეთის განყოფილების უფროსმა, ნელი ხიზანიშვილმა ჟურნალისტებს განუცხადა.
მისი თქმით, ლაგოდეხის სასაზღვრო პუნქტიდან საქართველოს ორი მოქალაქე, რომლებსაც საზღვრის კვეთისას მაღალი ტემპერატურა დაუფიქსირდათ, თბილისის საავადმყოფოში გადაიყვანეს.
რაც შეეხება პოლონეთიდან დაბრუნებულ ახალგაზრდა მამაკაცს, რომელსაც ხველა აღენიშნება, მასაც რამდენიმე საათში თბილისში გადაიყვანენ.
„თელავის მასშტაბით სამი საკარანტინო ზონაა, საიდანაც ტემპერატურის და ყელის წვის სიმპტომებით შუახნის ქალი თელავის ერთ-ერთ კლინიკაში მოათავსეს, მას უკვე აუღეს ანალიზები, რომელსაც ცოტა ხანში ლუგარის ლაბორატორიაში გაგზავნიან. ერთ კაცს კი, რომელსაც ხველა აქვს, რამდენიმე საათში თელავის საკარანტინო ზონიდან თბილისში გადაიყვანენ. ამ ეტაპზე კახეთში კორონავირუსის არც ერთი შემთხვევა არ დაფიქსირებულა და სიტუაცია კონტროლს ექვემდებარება“, - განაცხადა ნელი ხიზანიშვილმა.
მისივე ინფორმაციით, სპეციალისტების მეთვალყურეობა მოეხსნა 6 ადამიანს, ხოლო 3 საქართველოს მოქალაქე იძულების წესით საკარანტინო ზონაში პოლიციის დახმარებთ გადაიყვანეს.