ეროვნული ბანკის პრეზიდენტი კობა გვენეტაძე აცხადებს, რომ ბანკები, მიკროსაფინანსო ორგანიზაციები, სესხის გამცემი სუბიექტები, გადამცვლელი ჯიხურები აგრძელებენ მუშაობას და თავის ფუნქციას საგანგებო ვითარების გამოცხადების შემთხვევაშიც შეასრულებენ.
"ეროვნული ბანკის როლი მნიშვნელოვანია რადგანაც ჩვენს ქმედებებზეა დამოკიდებული თუ რამდენად გამართულად იმუშავებს ამ რთულ პერიოდში ფინანსური სისტემა. დღეს გავაკეთეთ განცხადება, რომ ამ სიტუაციაშიც ფინანსურ ოპერაციებთან დაკავშირებული ოპერაციების მთელი სპექტრი იქნება შენარჩუნებული. კომერციული ბანკები, მიკროსაფინანსო ორგანიზაციები, სესხის გამცემი სუბიექტები, გადამცვლელი ჯიხურები იმუშავებენ. ბანკომატები, გადახდის აპარატები გააგრძელებენ მუშაობას. ეს ყველაფერი საგანგებო ვითარების გამოცხადების შემთხვევაშიც შენარჩუნდება", - აღნიშნა გვენეტაძემ მთავრობის ადმინისტრაციაში უწყებათაშორისო საბჭოს სხდომის დასრულების შემდეგ.