შიდა ქართლის რეგიონში უკვე დაიკეტა ყველა კაფე, რესტორანი, სავაჭრო ობიექტი, ასევე, შეჩერებულია საზოგადოებრივი ტრანსპორტის მოძრაობა. მხარის გუბერნატორის ინფორმაციით, არიან მოქალაქეები, რომლებიც შიდაიზლაციის რეკომენდაციას არ ემორჩილებიან და საზოგადოებრივი ჯანდაცვის სამსახურების და პოლიციის ერთობლივი მუშაობით ხდება შესაბამისი ზომების მიღება.

,,მჭიდრო კოორდინაციაში ვართ დაავადებათა კონტროლისა და საზოგადოებრივი ჯანმრთელობის დაცვის ადგილობრივ ორგანიზაციასთან, ასევე, პოლიციასთან. სამწუხაროდ, არიან მოქალაქეები, რომლებიც თვითიზოლაციის რეკომენდაციას არ ემორჩილებიან და ამ სამსახურების ერთობლივი მუშაობით, ოპერატიულად ხდება შესაბამისი ზომების მიღება. კორონავირუსის გავრცელების პრევენციული ღონისძიებების ფარგლებში, არსებული რეკომენდაციის გათვალისწინებით, შიდა ქართლის ოთხივე მუნიციპალიტეტის ტერიტორიაზე უკვე დაიკეტა ყველა კაფე, რესტორანი, სავაჭრო ობიექტი, ასევე, სატრანსპორტო კომპანიების მფლობელებმა გაითვალისწინეს უწყებათაშორისი საკოორდინაციო საბჭოს რეკომენდაცია და ამ დროისთვის, საზოგადოებრივი ტრანსპორტის მოძრაობაც შეჩერებულია. მოგეხსენებათ, საქართველოს მთავრობა დღეს მიმართავს პრეზიდენტს, შემოიღოს საგანგებო მდგომარეობა მთელი ქვეყნის მასშტაბით 1 თვით, 2020 წლის 21 აპრილამდე, შესაბამისად, საგანგებო მდგომარეობის პირობები კიდევ უფრო მეტ შეზღუდვას ითვალისწინებს, რაზეც მოსახლეობა იქნება ინფორმირებული“, - განაცხადა ,,ინტერპრესნიუსთან“ შიდა ქართლის გუბერნატორმა გიგი ხოჯევანიშვილმა.