ადვოკატთა ასოციაცია დისტანციური სასამართლო სხდომების ჩატარების შესახებ რეკომენდაციებს ავრცელებს.

"მოგეხსენებათ, რომ COVID-19 ვირუსის პრევენციის მიზნით, საქართველოს მთავრობის მიერ გაცემული უსაფრთხოების ზომების შესაბამისად, საქართველოს ადვოკატთა ასოციაციის მიერ შემუშავებულ იქნა საადვოკატო საქმიანობის განხორციელების აუცილებელი რეკომენდაციები.

ამასთან, მიუხედავად ამ ექსტრაორდინალური სიტუაციისა, კანონის უზენაესობა და ადამიანის ფუნდამენტური უფლებები განუხრელად უნდა იქნას დაცული. შესაბამისად, ჩვენი - ადვოკატების როლი და მოვალეობა უცვლელია: უზრუნველვყოთ კლიენტებისთვის ხარისხიანი იურიდიული მომსახურების მიწოდება და ადამიანის უფლებების ეფექტიანი დაცვა.

იმ საქმეებთან მიმართებით, რომელიც დაკავშირებულია სპეციალურ/შემჭიდროვებულ ვადებთან, იმისთვის, რომ ერთის მხრივ, არ შეფერხდეს მართლმსაჯულების განხორციელება და მეორეს მხრივ, მაქსიმალურად იქნას დაცული ვირუსის პრევენციის მიზნით გაცემული რეკომენდაციები, საქართველოს ადვოკატთა ასოციაციის, იურიდიული დახმარების სამსახურის, საერთო სასამართლოების, საქართველოს პროკურატურის, პენიტენციური სამსახურისა და შინაგან საქმეთა სამინისტროს შორის კოორდინირებული მუშაობით, დაინერგა სასამართლო სხდომების დისტანციურად ჩატარების პლატფორმა.

დისტანციური პლატფორმის გამოყენების ინსტრუქციები ადვოკატებს შეუძლიათ იხილონ ასოციაციის ვებგვერდზე", - ნათქვამია ასოციაციის განცხადებაში.