ალავერდის საკათედრო ტაძარში საკვირო მსახურება აღევლინა. წირვა მღვდელმსახურებმა ჩატარეს. ლოცვის დასრულების შემდეგ ალავერდელმა მიტროპოლიტმა დავითმა იქადაგა.

მეუფემ განმარტა, რომ ზიარების საიდუმლო ჩვეულებრივ წესით მოხდება, რადგან ერთი კოვზის გამოყენება არ ნიშნავს ეპიდემის გავრცელებას, მიმდინარე პროცესები კი ღვთისგან სასწავლებლად მოვლენილი განსაცდელია, რისთვისაც მრევლს ლოცვისკენ მოუწოდა.

ეპარქიის მღვდელმთავარმა, ასევე აღნიშნა, რომ წმინდა სინოდის გადაწყვეტილებამ, ერთი კოვზით ზიარების არ შეცვლის შეასახებ, მოსახლეობის ნაწილის უთანხმოება გამოიწვია თუმცა ხალხის გონიერება დაპირისპირებას არ დაუშვებს.

"დღეს არის 40 მოწამის და ჯვრის თაყვანისცემის დღე. საოცარი დღესასწაულია და ესე იგი ამდენი მრევლის სიმრავლე შუა მარხვის კვირა დღეს პირველად ვნახე, რაც სასიხარულოა. ამის განსაზღვრება შეიძლება იყოს ზოგი ჭირი მარგებელიაო. იმიტომ, რომ რაც დღეს ჩვენთან ხდება, ყველა, თითოეული ჩვენთაგანის, მორწმუნის თუ ურწმუნოს ყურადღება არის მოპყრობილი, ამ ფაქტის სახით, მაგრამ ქრისტიანები, ქრისტეს მოყვარე ადამიანები სულ სხვა ბუნების ვართ. განსაცდელს კი არ ვუფრთხით და გვეშინია, ვიღებთ როგორც ღვთისაგან სასწავლოდ მოვლენილ მწარე წამალ ქინაქინას, რომელსაც მორჩილებით ვიღებთ და უფალს ვევედრებით მოგვცეს მშვიდობა. ახლაც გვაქვს იმედი ღვთის შეწევნის, რომ მოისმენს ჩვენს ლოცვას.

დღევანდელი განსაცდელი ქრისტიანებს უფრო მეტს გვავალდებულებს. ჩვენ არასოდეს ვყოფილვართ შფოთის თავი, ვცდილობთ ვიყოთ მომთმენები, მაგრამ თუ ეს რწმენას შეეხება იქ ყოველთვის ვართ აღმსარებელნი. ამიტომაც მიხარია ტაძრებში, რომ ბევრი მორწმუნე დგას. მაგრამ ერთი უნდა ვიცოდეთ, რომ ეს მოგვეცა იმიტომ რომ კიდევ უფრო გავფრთხილდეთ“,-განაცხადა მეუფემ.

მისივე თქმით, ის, რასაც ექიმები გვირჩევენ, გასათვალისწინებელია.

„დღეს რატომ ითხოვენ ეკლესიის დახურვას, ინფექცია გავრცელდებაო, იქნება ინფექცია სხვაგან უფრო გავრცელდება. ერთი კოვზით ზიარება პირიქით ღვთისგან მოცემული ჯილდოა. ქრისტიანი, რომელიც მოდის მოყვასის მოყვარული თავის თავს არ მისცემს უფლებას უღირსად ეზიაროს. ეს ბრძოლაა, ხილული და უხილავი ყოველთვის იბრძვის გაანადგუროს ჯერ გული და მერე გონება, რადგან ეს არის ღვთის საბრძანებელი. ნუ ეშინია მცირე სამწყსოს და დანარჩენ წუთისოფელს და ქვეყანას. რატომ? - იმიტომ რომ ქრისტიანებს გვყავს ღმერთი და ღმერთს ვევედრებით დაიცვას ყველა, მტერიც და მოყვარეც. არაფერი საშიში არ არის. ღვთის მადლით ყველაფერი იქნება დაცული, მაგრამ ჩვენი მხრივ გვმართებს გონიერება, რასაც გვირჩევენ ექიმები გასათვალისწინებელია", - თქვა მეუფემ.

მუფემ ასევე აღნიშნა, რომ მათთვის მოულოდნელი იყო საგანგებო მდგომარეობის გამოცხადება, რის გამოც ტაძრის ეზოში რადიო დინამიკების განთავსება ვერ მოესწრო.

"ჩვენ გავიზიარებთ ახალ წესებს, რასაც ითვალისწინებს საგანგებო მდგომარეობა. თვითონ ალავერდის ტაძარი გვაძლევს ამის საშუალებას, რომ ბევრი ადამიანი დაესწროს ლოცვას ისე, რომ დისტანცია იყოს დაცული. ამასთანავე, მომავალი კვირისთვის რადიოხმოვნებს დავამონტაჟებთ, რომ დღესასწაულებზე მრევლმა შეძლოს ეზოში დგომა და ლოცვის მოსმენა“,-აღნიშნა მან.