ზვიად შალამბერიძემ მოხალისეებს მადლობა გადაუხადა და აღნიშნა, რომ მსურველთა ტრეინინგები რეგიონის მასშტაბით, სხვადასხვა მუნიციპალიტეტებში ინტენსიურად მიმდინარეობს და ისინი უკვე ხვალიდან ბენეფიციარებს დახმარებებს ადგილზე მიუტანენ. ამის შესახებ „ინტერპრესნიუსს“ იმერეთის სახელმწიფო რწმუნებულის ადმინისტრაციიდან აცნობეს.

მისივე თქმით, მოხალისეებს აქვთ ხელისუფლების სრული მხარდაჭერა და თანადგომა.

„სახელმწიფო რწმუნებულთან ერთად ადგილზე წყალტუბოს მუნიციპალიტეტის მერი გრიგოლ იოსელიანიც იმყოფებოდა.

წყალტუბოს მუნიციპალიტეტში 70 წელს გადაცილებული მოქალაქეებისათვის საკვები პროდუქტებისა და მედიკამენტების, ასევე სხვადასხვა საჭირო მომსახურების გაწევისას შესაბამისი რეკომენდაციები მოხალისეებს წითელი ჯვრის წარმომადგენლებმა გააცნეს.

აღინიშნა, რომ უკვე არსებობს 500-მდე ხანდაზმულის სია, რომლებიც წყალტუბოს მუნიციპალიტეტში დახმარებას მიიღებენ.

ამ ეტაპზე წყალტუბოს მუნიციპალიტეტში 56 მოხალისეა და ისინი მოვალეობის შესრულებას სრულად მომზადებული ხვალიდან შეუდგებიან.

იმერეთის რეგიონში, გადამზადებული მოხალისეები ბენეფიციარებს პროდუქტებს და საჭირო ნივთებს უკვე აწვდიან“,-ნათქვამია ინფორმაციაში.