საბერძნეთში კორონავირუსის გავრცელების თავიდან ასაცილებლად, ქვეყნის მთავრობამ მოქალაქეებისთვის ყოველგვარი მგზავრობა და გადაადგილება აკრძალა. ამის შესახებ საბერძნეთის პრემიერ-მინისტრმა კრიაკოს მიცოტაკისმა მოქალაქეებისადმი სატელევიზიო მიმართვისას განაცხადა. აკრძალვა 23 მარტის 6:00 საათიდან შედის ძალაში. აკრძალვის დამრღვევს 150 ევროს ოდენობით დააჯარიმებენ.
პრემიერის თქმით, იტალიაში ყოველ წუთში ორი ადამიანი კვდება, რასაც საბერძნეთი ვერ დაუშვებს.
დღე-ღამის განმავლობაში საბერძნეთში 94 ადამიანი დაინფიცირდა, რის შედეგადაც, ქვეყანაში 624 ადამიანი დაინფიცირდა. ჰოსპიტალიზებულია 124 ადამიანი, რომელთაგან 34 ინტენსიური თერაპიის განყოფილებაში მკურნალობს. ბოლო 24 საათში გარდაიცვალა ორი ადამიანი. მთლიანობაში საბერძნეთში კორონავირუსს 15 ადამიანი ემსხვერპლა.