თავდაცვის სამინისტროს გორის სამხედრო ჰოსპიტალში მოთავსებული ორი ინფიცირებულის ჯანმრთელობის მდგომარეობა დამაკმაყოფილებელია, - ამის შესახებ ჰოსპიტალის დირექტორმა დავით ბარლიანმა განაცხადა. ბარლიანის ინფორმაციით, ამ დროისთვის, სამხედრო ჰოსპიტალის საკარანტინო ზონასა და ბოქსირებულ პალატებში მოთავსებულია 53 პაციენტი.

,,სამხედრო ჰოსპიტალის საკარანტინო ზონასა და ბოქსირებულ პალატებში მოთავსებულია 53 პაციენტი. აქედან 33 სამხედრო მოსამსახურეა, 20 კი - სამოქალაქო პირი, რომელთაგან ერთი უცხო ქვეყნის მოქალაქეა. ყველას მდგომარეობა დამაკმაყოფილებელია. რაც შეეხება ახალი კორონავირუსით ინფიცირებულებს, ორივე პაციენტის მდგომარეობა დამაკმაყოფილებელია. ორივე მათგანის შემთხვევაში, სუსტადაა გამოხატული კლინიკური ნიშნები. გუშინ, დამატებით გაიგზავნა 5 სინჯი და ყველა პასუხი უარყოფითია. ამ წუთებში მიმდინარეობს სკრინინგი და გადაწყდება, კიდევ რამდენი ნიმუში გაიგზავნება ლაბორატორიაში“, - განაცხადა გორის სამხედრო ჰოსპიტალის დირექტორმა.