ბორჯომში დეზინფექციის სამუშაოები გრძელდება

ბორჯომში მასშტაბური დეზინფექციის სამუშაოები გრძელდება. ამჯერად „დასუფთავებისა და კეთილმოწყობის სამსახურის“ თანამშრომლებმა სპეციალური ხსნარებით ქალაქის მასშტაბით არსებული სკვერები, სატრენაჟორო სივრცეები და სპორტული მოედნები დაამუშავეს. ამის შესახებ „ინტერპერესნიუსს“ ბორჯომის მუნიციპალიტეტიდან აცნობეს.

მათივე ინფორმაციით, დასუფთავდა და დეზინფექცია ჩაუტარდა 9 აპრილის ქუჩაზე არსებულ მინერალური წყლის ბიუვეტს, ასევე მიმდებარე ტერიტორიას, საფეხმავლო ბილიკებსა და აქამდე გარე-ვაჭრობისთვის გამოყოფილ ადგილებს.

ამ დრომდე მუნიციპალიტეტში საჯარო დაწესებულებებში ჩატარებული სადეზინფექციო ღონისძიებების გარდა, გაირეცხა და სპეციალური ხსნარებით დამუშავდა ავტომოსაცდელები, სანაგვე კონტეინერები და ურნები, ქალაქის მთავარ ქუჩაზე გზის გამყოლი მოაჯირები და ლამპიონები.

ბორჯომის მუნიციპალიტეტის ინფორმაციით, მერის მოვალეობის შემსრულებლის დავით ზაალიშვილის ხელმძღვანელობით, მუნიციპალიტეტში შექმნილია სამუშაო ჯგუფი, რომელიც მერიისა და ა(ა)იპ სამსახურების ჩართულობით, 24 საათის განმავლობაში, შაბათ-კვირის ჩათვლით, განსაკუთრებული რეჟიმით მუშაობს.

დავით ზაალიშვილის თქმით, ჯგუფი მაქსიმალურად მობილიზებულია და მზადაა საგანგებო სიტუაციაში ყველა დავალებაზე მოახდინონ რეაგირება და გადადგან შესაბამისი ნაბიჯები.

ბორჯომის მუნიციპალიტეტში ამოქმედებულია ცხელი ხაზი (0367) 22-33-55; (0367) 22-44-99; მოქალაქეებს 24 საათის განმავლობაში შეუძლიათ ადგილობრივ ხელისუფლებას დაუკავშირდნენ.