პოლიტიკური პარტია „ლელო საქართველოსთვის“ დამფუძნებლის, მამუკა ხაზარაძის განცხადებით, კორონავირუსის წინააღმდეგ ბრძოლაში ჩართულობისთვის ბიზნესი მზადაა. როგორც ხაზარაძემ ტელეკომპანია „პალიტრანიუსის“ გადაცემაში „360 გრადუსი“ განაცხადა, პრემიერ-მინისტრ გიორგი გახარიას მიერ საავიაციო კომპანია „აირზენას“ მისამართით გაკეთებული განცხადება არასწორია.
„ვფიქრობ, რომ ბიზნესი მზად არის, მაგრამ აქ არის დამოკიდებულება შესაცვლელი. მე გუშინ მოვისმინე „აირზენას“ მიმართულებით გაკეთებული განცხადება, რაც არის მცდარი და არასწორი, ამ კრიტიკულ სიტუაციაში. მე დეტალებში არ ჩავალ და არც მაინტერესებს, სიმართლე გითხრათ.
საავიაციო ინდუსტრია არის ნომერ პირველი, რომელმაც ყველაზე დიდი ზარალი განიცადა. გამონაკლისი არც „აირზენაა“, მაგრამ ეს დამოკიდებულება, რაც ჩვენ მოვისმინეთ, არაა სწორი. იცით ჩემი დამოკიდებულება პრემიერ გახარიას მიმართ, მაგრამ მე ვიყავი პირველი, ვინც შევთავაზე მთავრობას გვერდში დადგომა ამ რთულ სიტუაციაში. აქ პერსონალური ამბები უნდა გადავწიოთ გვერდზე და ყველა გავერთიანდეთ, რათა ქვეყანა გამოვიყვანოთ ამ მდგომარეობიდან. დღეს ბიზნესს უნდა შესთავაზო კონკრეტული პაკეტი და არა რაღაც საუბრები, რომ გვერდში დაგვიდექით“,- განაცხადა ხაზარაძემ.
ცნობისთვის, გუშინ გიორგი გახარიამ განაცხადა, რომ „კომპანია „აირზენას“ დირექტორი ელოდება იმას, რომ რაც შეიძლება მეტ ფულს გადაუხდიან და სხვას არაფერს”.