ხარაგაულის მერიის და საზოგადოებრივი ჯანმრთელობის დაცვის ცენტრის ორგანიზებით დეზინფექცია ჩაუტარდა დაბაში მდებარე ყველა სასურსათო მაღაზიას, აფთიაქს და საჯარო დაწესებულებას. ამის შესახებ "ინტერპრესნიუსს" ხარაგაულის მუნიციპალიტეტიდან აცნობეს.

მათივე ინფორმაციით, მუნიციპალიტეტში სადეზინფექციო სამუშაოები პერიოდულად გაგრძელდება და მის მიმდინარეობას ჯანდაცვის ცენტრი გაუწევს მონიტორინგს.

"მერიაში კორონავირუსის პრევენციის მიზნით შექმნილი სამუშაო ჯგუფი ყოველდღიურ რეჟიმში იკრიბება, სადაც ისმენენ ინფორმაციას ხარაგაულში არსებული მდგომარეობის შესახებ. დაბის ქუჩებში პერიოდულად რიგდება ვირუსის გავრცელების თავიდან ასაცილებლად სარეკომენდაციო ბუკლეტები.

დღეის მდგომარეობით ხარაგაულში 12 პირი რჩება თვითიზოლაციაში და ხარაგაულის ერთი მოქალაქეა კარანტინში.

მუნიციპალიტეტს ამ ეტაპზე არ ყავს არც ერთი ინფიცირებული პაციენტი. სხვა ქვეყნიდან შემოსულ მოქალაქეებზე სრულ მონიტორინგს ახორციელებს ხარაგაულის საზოგადოებრივი ჯანდაცვის ცენტრი",-ნათქვამია ინფორმაციაში.