ბათუმში კორონავირუსის ახალი შემთხვევა დაფიქსირდა, -ამის შესახებ აჭარის ჯანდაცვის მინისტრმა ზაალ მიქელაძემ ჟურნალისტებს განუცხადა.

მისი ინფორმაციით, ინფიცირებული პირი კლინიკაში 24 მარტს ტემპერატურის მატებით მოათავსეს, იგი სარფის საბაჟო გამშვები პუნქტიდან საკარანტინო სივრცეში იყო გადაყვანილი.

ზაალ მიქელაძის თქმით, ამ დროისათვის აჭარაში კორონავირუსის 6 დადასტურებული შემთხვევაა.

ცნობისთვის, ბათუმის ინფექციურ საავადმყოფოში კიდევ სამი პაციენტი საეჭვო ნიშნით იმყოფებოდა, მათ კორონავირუსი არ დაუდასტურდათ. მოქალაქეები მედიკოსების მეთვალყურეობას საკარანტინო სივრცეში გააგრძელებენ. აჭარაში საკარანტინო სივრცეში 1700-ზე მეტი პირია მოთავსებული.

ცნობისთვის, საქართველოში კორონავირუსით ინფიცირების შემთხვევათა რაოდენობა 75 -მდე გაიზარდა. ამის შესახებ ინფორმაცია მთავრობის მიერ შექმნილ სპეციალურ ვებ-გვერდზე stopcov.ge-ზე არის განთავსებული. კარანტინის რეჟიმშია 4055 ადამიანი, ხოლო სტაციონარში მეთვალყურეობის ქვეშ - 252 პირი. ინფორმაციისთვის, 75 ადამიანიდან 10 გამოჯანმრთელებულია. ბათუმში დადასტურებული შემთხვევა აღნიშნულ სტატისიკაში შედის.