რესპუბლიკური საავადმყოფოს დირექტორის, ლევან გოფოძის ინფორმაციით, თბილისში არსებული საკარანტინო სივრცეებში მოთავსებული ადამიანების ჯანმრთელობის მდგომარეობა, რომელთაც რესპუბლიკური საავადმყოფო კურირებს, „სტაბილურად კარგია“.
ამასთან, როგორც გოფოძე განმარტავს, ერთ პაციენტს აღენიშნება ცხელება და მას საავადმყოფოში გადაიყვანენ და დააკვირდებიან.
„ჩვენ იმდენ საკარანტინო სივრცეს ვკურირებთ, ჩამოთვლას აზრი არ აქვს. ჩვენი გეოგრაფია ძალიან გაიშალა. რესპუბლიკურ საავადმყოფოს დაევალა, რომ უხელმძღვანელოს საკარანტინო ზონებში სამედიცინო მომსახურეობას. უნდა გითხრათ, რომ თბილისში არსებულ საკარანტინო სივრცეში მდგომარეობა სტაბილურად კარგია. იცით, რომ ადამიანები ნორმალურ პირობებში არიან, სასტუმროებში ცხოვრობენ, რაც კარანტინისთვის ძალიან ძვირფასი რამ არის. იყო საუბარი, რომ იქიდან ერთ პაციენტს ცხელება აქვს და დღეს მას გადმოვიყვანთ, მოვათავსებთ და დავაკვირდებით აქ“,-აცხადებს რესპუბლიკური საავადმყოფოს გენერალური დირექტორი.