ქუთაისში რეგისტრირებულ 600-ზე მეტ მრავალშვილიან ოჯახში, რომელთაც 4 და მეტი შვილი ჰყავთ, დღეიდან სასურსათო ამანათები დარიგდება. აღნიშნულის შესახებ „ინტერპრესნიუსს“ ქუთაისის მერიიდან აცნობეს.

როგორც მათ ინფორმაციაშია აღნიშნული, ქუთაისის მერია პანდემიასთან ბრძოლის პირობებში აგრძელებს სხვადასხვა სახის სოციალურ ღონისძიებებს.

„ქუთაისის სპორტის სასახლეში კერძო სექტორის მიერ შეგროვდა პირველადი მოხმარების სურსათ-სანოვაგე, რომელიც დაფასოებული იქნა მერიის მოხალისეთა გუნდის წევრების მიერ და ყოველდღიურად რიგდება მოსახლეობის სხვადასხვა სეგმენტში.

ამჯერად ამანათები გამზადდა მრავალშვილიანი დედებისთვის. ამანათების გამზადების პროცესსა და დარიგებაში უშუალოდ მონაწილეობენ ქუთაისის მერი, მერის მოადგილეები, პარლამენტის მაჟორიტარი დეპუტატი დიმიტრი მხეიძე და საკრებულოს წევრები“,-ნათქვამია ინფორმაციაში.