საველე ჰოსპიტალში რიგები არ არის, იქ მაქსიმუმ 5-6 ადამიანი შეიძლება იყოს, - ამის შესახებ ჟურნალისტებთან საუბარში ქვემო ქართლში სახელმწიფო რწმუნებულმა შოთა რეხვიაშვილმა განაცხადა.
,,მინდა გითხრათ, რომ საველე ჰოსპიტალში ხდება ხოლმე, რომ 5-6 ადამიანი შეიძლება ღამითაც დარჩეს იქ დასკვნის მიღების პერიოდში. დადგა საჭიროება მათი კვებით უზრუნველყოფის და ძალიან დიდი მადლიერება მინდა გამოვხატო მარნეულში არსებული ერთ-ერთი დიდი სუპერმარკეტის ქსელის მიმართ, მათ გამოთქვეს სურვილი უსასყიდლოდ მოემსახურონ საველე ჰოსპიტალის პერსონალს და იქ დარჩენილ მოქალაქეებს. საველე ჰოსპიტალში არავითარი რიგები არ არის, გუშინ ღამითაც ვიყავი და მაქსიმუმ 5-6 ადამიანი ელოდება. არავითარი რიგები არ არის გარწმუნებთ“, - განაცხადა შოთა რეხვიაშვილმა.
მისივე განცხადებით, საკარანტინო ზონაში, ყველა გზა მაქსიმალურად კონტროლდება.
,,მე მაქვს ინფორმაცია, რომ ყველა გზა, საფეხმავლო ბილიკებიც მაქსიმალურად კონტროლდება და თუ ვინმე ახერხებს ტერიტორიის დატოვებას, ასეთი ინფორმაცია, მე არ მაქვს. ვიცი, რომ ძალოვანი სტრუქტურების მიერ სრულად კონტროლდება გადაადგილება საკარანტინო ზონაში. გატარებული ღონისძიებების შედეგად მაქსიმალურად არის შემცირებული კონტაქტები და გადაადგილება მუნიციპალიტეტებში და ზოგადად ქვემო ქართლის რეგიონში“, - განაცხადა ქვემო ქართლის გუბერნატორმა.