ბათუმის ორ საავადმყოფოში მოთავსებული კორონავირუსით ინფიცირებული შვიდი პირიდან ერთის ჯანმრთელობის მდგომარეობა საშუალო სიმძიმისაა.

როგორც აჭარის ჯანდაცვის მინისტრი ზაალ მიქელაძე აცხადებს, ინფიცირებულ მამაკაცს კორონავირუსთან ერთად, სხვა თანმდევი ქრონიკული დაავადებებიც აღენიშნება.

მისივე ინფორმაციით, ექვსი პირის ჯანმრთელობის მდგომარეობა დამაკმაყოფილებელია.

„ბოლო 24 საათის მანძილზე, საკარანტინე და თვითიზოლაციის სივრცეებიდან კლინიკაში 12 მოქალაქე გადავიყვანეთ, აქედან 11 პასუხი კოვიდ-19 უარყოფითი მოვიდა, ხოლო ერთს დაუდასტურდა. 27 მარტის მონაცემებით, ბათუმის ორ კლინიკაში 7 ადამიანი მკურნალობს. აქედან, 3 პაციენტი ბათუმის ინფექციურ საავადმყოფოში იმყოფება, 4 კი „მედალფა ბათუმის კლინიკაში", - განაცხადა ზაალ მიქელაძემ.