თურქეთმა, დაახლოებით 6 000 მიგრანტი, რომლებიც თურქეთ-საბერძნეთის საზღვართან იყვნენ გაჩერებული, რათა ევროკავშირში შეეღწიათ, უკან დააბრუნა. ინფორმაციას ქვეყნის შინაგან საქმეთა სამინისტრო ავრცელებს.
აღნიშნული ზომა ანკარამ კორონავირუსის გავრცელების თავიდან აცილების მიზნით მიიღო.
მედიის ინფორმაციით, მიგრანტები სპეციალური ავტობუსებით გესთ ჰაუსებში გადაიყვანეს, სადაც ისინი იზოლაციაში მოთავსდებიან. ისინი თურქეთში თავიანთ თავდაპირველ სამყოფელში მხოლოდ კარანტინის შემდეგ შეძლებენ დაბრუნებას.
ცნობისთვის, რეჯეფ ტაიფ ერდოღანმა რამდენიმე კვირის წინ განაცხადა, რომ მიგრანტებს ევროკავშირისკენ გზას გაუხსნიდა. ათასობით ადამიანი საბერძნეთის საზღვართან იყო შეკრებილი და ქვეყანაში შესვლას ითხოვდა.