გორის მუნიციპალიტეტის საბავშვო ბაღების 6000 აღსაზრდელი კუთვნილ საკვებს არამალფუჭებადი პროდუქტების სახით მიიღებს. ამის შესახებ “ინტერპრესნიუსს” გორის მერიიდან აცნობეს. მათი ინფორმაციით, პროდუქტების გაცემა გორის მუნიციპალიტეტის სკოლამდელი აღზრდის სააგენტომ ბაგა-ბაღების ადმინისტრაციებთან ერთად დღეს დაიწყო.

“პროცესს გორის მუნიციპალიტეტის მერის მოადგილე პაატა ივანიშვილი და სააგენტოს მენეჯერი ლია კოვზიაშვილი გორის მე-12 და მე-19 ბაგა-ბაღებში დაესწრნენ. პროდუქტების დარიგება ორგანიზებულად-სანიტარულ-ჰიგიენური ნორმებისა და სოციალური დისტანციის დაცვით მიმდინარეობს.

პაკეტი 8 დასახელების არამალფუჭებად პროდუქტს შეიცავს და განკუთვნილია ბაგა-ბაღის ყველა აღსაზრდელისთვის, განურჩევლად სოციალური სტატუსისა. ახალი კორონავირუსის გავრცელების თავიდან არიდების მიზნით, ბაგა-ბაღებში სასწავლო პროცესი, უწყებათაშორისი საკოორდინაციო საბჭოს რეკომენდაციით, საგაზაფხულო არდადეგების შემდეგ 16 მარტიდან აღარ განახლებულა, რის გამოც მერიამ მიიღო გადაწყვეტილება, ბაგა-ბაღებში ბავშვთა კვებისთვის გათვალისწინებული პროდუქტი, აღსაზრდელების მშობლებისთვის გადაეცა”, - ნათქვამია ინფორმაციაში.