ბათუმში, ბარათაშვილის ქუჩაზე ორსართულიან საცხოვრებელ კორპუსში გაჩენილი ხანძრის შედეგად არავინ დაშავებულა.

ორსართულიან კორპუსში რამდენიმე ოჯახი ცხოვრობს. მოსახლეობას ხანძრის დროს შენობის დატოვებაში მაშველი-მეხანძრეები დაეხმარნენ, რომლებიც აივნებიდან გამოიყვანეს.

ხანძრის გამომწვევი მიზეზები უცნობია. შემთხვევის ადგილზე რვა სახანძრო-სამაშველო ჯგუფი და სამართალდამცავებიც იმყოფებიან. ამ დროისათვის ხანძრის ლიკვიდაცია მიმდინარეობს.

„ოჯახების რაოდენობა უცნობია, რადგან იტალიური ეზოა. სახანძრო სამსახური და ბათუმის მერიის თანამშრომლები აქ იმყოფებიან.

დაზარალებულ ოჯახებს თავშესაფარში გადავიყვანთ. ხანძრის შედეგად დაზარალებულ ოჯახებს, ბათუმის მერიაში შექმნილი სპეციალური კომისია შეისწავლის. ამ ეტაპზე მთავარია ხანძრის ჩაქრობა. ხანძრის გამომწვევ მიზეზებს სამართალდამცავები შეისწავლიან",- განაცხადა ბათუმის მერმა ლაშა კომახიძემ, რომელიც შემთხვევის ადგილზე მივიდა.

საპატრულო პოლიციის ეკიპაჟმა შემთხვევის ადგილზე მისულ მოქალაქეებს, ტერიტორია დაატოვებინეს და მათ მოუწოდეს, რომ ხალხმრავალ ადგილზე შეკრებისკან თავი შეიკავონ.