მცხეთა-მთიანეთში ინფრასტრუქტურული სამუშაოები შეუფერხებლად გრძელდება. მხარის სახელმწიფო რწმუნებულმა შალვა კერესელიძემ, მცხეთის მუნიციპალიტეტის მერთან გიორგი კაპანაძესთან ერთად, ქალაქ მცხეთაში და მუნიციპალიტეტის რამდენიმე სოფელში საგზაო ინფრასტრუქტურის სარეაბილიტაციო სამუშაოები მოინახულა და ადგილზე არსებულ ვითარებას გაეცნო. ამის შესახებ „ინტერპრესნიუსს“ მცხეთა-მთიანეთის სახელმწიფო რწმუნებულის პრესსამსახურიდან აცნობეს.
მათივე ინფორმაციით, ამ ეტაპზე, მცხეთის მუნიციპალიტეტის მასშტაბით გზების მოასფალტება 20-მდე დასახლებაში მიმდინარეობს.
„სარეაბილიტაციო-კეთილმოწყობის სამუშაოების მნიშვნელოვანი ნაწილი უკვე დასრულების ეტაპზეა. პროექტების ჯამური ღირებულება დაახლოებით 5 მილიონ ლარს შეადგენს. სამუშაოები რეგიონული განვითარებისა და ინფრასტრუქტურის სამინისტროს რეგიონებში განსახორციელებელი პროექტების ფონდიდან ფინანსდება“, - აღნიშნულია ინფორმაციაში.