ქვემო ქართლში სახელმწიფო რწმუნებული შოთა რეხვიაშვილი მოქალაქეებს კორონავირუსთან დაკავშირებით აუცილებელი რეკომენდაციების გათვალისწინებისა და სახლში დარჩენისკენ მოუწოდებს. როგორც მან ჟურნალისტებს განუცხადა, თუ ხალხი მითითებებს არ დაემორჩილება, უახლოესი კვირებისა და თვეების განმავლობაში უფრო მკაცრ რეჟიმში ყოფნა მოგვიწევს.
ამასთან, რეხვიაშვილის თქმით, ქვეყანაში კორონავირუსის შიდა გადაცემა დაფიქსირდა, ამიტომ საფრთხის თავიდან ასაცილებლად ყველას მოქალაქეობრივი პასუხისმგებლობა სახლში დარჩენას გულისხმობს.
„შემოწმდება ეს ხალხი, თუმცა ყველა მცდელობა, ყველა დაგეგმილი აუცილებელი პრევენციული ღონისძიებები, რაც ზოგადად, შეთანხმებულად ჯანდაცვის, დაავადებათა კონტროლისა და ცენტრალური ხელისუფლების მეშვეობით ხორციელდება, ფუჭი იქნება, თუ მოსახლეობა, ხალხი კიდევ უფრო მეტად ადეკვატური არ იქნება. ამას ვამბობ იმიტომ, რომ გუშინდელი ინფორმაციიდან დადასტურდა შიდა გადაცემები და წყარო დადგენილი არ არის, ამიტომ არგუმენტი იმისა, რომ 4 დღე, ერთი კვირა სახლში ვარ და მომეწყინა, არგუმენტი არ არის. თუ მითითებებს არ დავემორჩილებით, მოგვიწევს კვირები და თვეები უფრო მკაცრ რეჟიმში ყოფნა. ამიტომ, ყველას მორალური, მოქალაქეობრივი პასუხისმგებლობა და შეგნება მოითხოვს, მითითებებს დავემორჩილოთ, გავუფრთხილდეთ საკუთარ სიცოცხლეს, ოჯახებსა და ქვეყანას“,-აცხადებს რეხვიაშვილი.