ქვემო ქართლში სახელმწიფო რწმუნებულმა შოთა რეხვიაშვილმა, რეგიონის მუნიციპალიტეტის მერებთან სამუშაო შეხვედრა გამართა. როგორც "ინტერპრესნიუსს" ქვემო ქართლის სამხარეო ადმინისტრაციიდან აცნობეს, მერებთან შეხვედრაზე გუბერნატორმა ქვეყანაში გამოცხადებული საგანგებო მდგომარეობის ფარგლებში ადგილზე გამოვლენილი საჭიროებები დეტალურად განიხილა.

საუბარი შეეხო რეგიონის მოსახლეობის ჯანმრთელობისა და სოციალური დაცვის მიზნით დამატებით განსახორციელებელ ღონისძიებებს, ასევე საინფორმაციო კამპანიის კიდევ უფრო მეტად გააქტიურებას, განსაკუთრებით ეთნიკური უმცირესობებით დასახლებულ ქალაქებში და სოფლებში. შოთა რეხვიაშვილმა და ადგილობრივი ხელისუფლების წარმომადგენლებმა, მუნიციპალიტეტების მასშტაბით, პრევენციულ ღონისძიებებში ჩართული ადამიანური რესურსის შესახებ იმსჯელეს და მათი შესაბამისი ეკიპირებით უზრუნველყოფის საკითხი განიხილეს.