ბორჯომში მრავალბინიან კორპუსებში სადეზინფექციო სამუშაოები მიმდინარეობს. როგორც „ინტერპრესნიუსს“ ბორჯომის მუნიციპალიტეტის საზოგადოებასთან ურთიერთობის სამსახურიდან აცნობეს, სპეციალური ხსნარებით, მუშავდება, მრავალბინიანი საცხოვრებელი სახლების სადარბაზოები და გარე სივრცეები: ეზოებში არსებული სკვერები, სპორტული მოედნები სანაგვე ურნები და ა.შ.

მათივე ინფორმაციით, სადეზინფექციო სამუშაოები უკვე ჩატარდა ბორჯომში აფხაზეთიდან იძულებით გადაადგილებული დევნილი მოსახლეობის საცხოვრებელ კორპუსებში. ღონისძიებები ეტაპობრივად ყველა კორპუსში მოხალისეთა ჯგუფების მიერ განხორციელდება.

„მიმდინარე სამუშაოებში აქტიურად იყვნენ ჩართულები მერიისა და სასტუმრო Crowne Plaza-ს თანამშრომლები და ადგილობრივი მაცხოვრებლები. პარალელურად, ბორჯომში ყოველდღიურ რეჟიმში მიმდინარეობს ქუჩების რეცხვა-დეზინფექცია. კორონავირუსის გავრცელების პრევენციის მიზნით, ყოველ დილით ხსნარებით მუშავდება საავტომობილო გზები, საფეხმავლო ბილიკები, მოსაცდელები და სანაგვე ურნები“,-აღნიშნულია ინფორმაციაში.