ბორჯომის მუნიციპალიტეტში 15-ზე მეტ ობიექტზე ინფრასტრუქტურული პროექტები მიმდინარეობს. ამის შესახებ „ინტერპრესნიუსს“ ბორჯომის მუნიციპალიტეტის მერიიდან აცნობეს.
მათივე ცნობით, სოფელ ტაძრისში მიმდინარე სამშენებლო სამუშაოები, მერის მოვალეობის შემსრულებელმა დავით ზაალიშვილმა და საკრებულოს თავმჯდომარის მოვალეობის შემსრულებელმა ოთარ არბოლიშვილმა დაათვალიერეს.
„სოფელში რეაბილიტაცია უტარდება ბიბლიოთეკის შენობის პირველ სართულს. შეიცვლება იატაკი, ჭერი, კედლები, ელექტროგაყვანილობა და კარ-ფანჯარა. მოხდება წყალგაყვანილობის ქსელის მოწყობა. უნდა აღინიშნოს, რომ სოფელს სულ მალე ცეკვისა და სპორტის გაკვეთილებისთვის შესაბამისი დარბაზის საკითხიც მოუგვარდება. სოფელში უკვე დაწყებულია შეხვედრებისთვის განკუთვნილი ფართის რეაბილიტაცია, სადაც აღნიშნული სივრცეები განთავსდება, შენობაში გათვალისწინებულია ასევე გასახდელებისა და სველი წერტილების მოწყობა“, - ნათქვამია ინფორმაციაში.