იუსტიციის მინისტრის თეა წულუკიანის განცხადებით, ერთადერთი, ვინც პატიმართან იქნება შეხებაში, მაგრამ დაწესებულების ტერიტორიაზე არ დარჩება ეს არის სამედიცინო პერსონალი. აქედან გამომდინარე, მინისტრის თქმით, სამედიცინო პერსონალი კიდევ უფრო მკაცრი წესების დაცვით იქნება აღჭურვილი.
„ჩვენი სამედიცინო პერსონალი არის და კიდევ უფრო მკაცრ პირობებში იქნება აღჭურვილი იმისთვის, რომ გამოირიცხოს ნებისმიერი რისკი მათ მიერ ციხეში ვირუსის შეტანის. ეს იქნება ორმაგი კონტროლი ციხის გარეთ, როგორც ეს იყო დღემდე. ისინი შემოწმდებიან და მხოლოდ ყველანაირი ეჭვის გამორიცხვის შემთხვევაში, დაიშვებიან დაწესებულების ტერიტორიაზე, სადაც ისინი იქნებიან მაქსიმალურად აღჭურვილები იმისთვის, რომ ვირუსი არ შეიტანონ,“-განაცხადა თეა წულუკინმა.
რაც შეეხებათ ადვოკატებს, იუსტიციის მინისტრის განცხადებით, ისინი საპატიმროში სიარულს მკაცრ პირობებში გააგრძელებენ და იმ შემთხვევაში, თუ არანაირი დოკუმენტაცია არ იქნება ხელმოსაწერი, მათი პატიმართან შეხვედრა მოხდება მინის ბარიერის მეშვეობით.
„ადვოკატები, ზუსტად ისევე მკაცრ პირობებში, როგორიც ეს იყო დღემდე, გააგრძელებენ საპატიმროში სიარულს, მხოლოდ იმ შემთხვევაში, თუკი არსებობს ამისი პროცედურული საჭიროება, მაგალითად შეხვდნენ ბრალდებულს, რომელსაც თავისი პროცედურული ვადები აქვს და თუკი ხელმოსაწერი არ არის რაიმე სახის დოკუმენტაცია, შეხვედრა შედგება მხოლოდ მინის ბარიერის მეშვეობით. თუ ხელმოსაწერია დოკუმენტი, როგორც ადვოკატი, ასევე პატიმარი არის აღჭურვილი იმისთვის, რომ ადვოკატმა პატიმარს არ მოუტანოს ვირუსი. სხვა არავინ პატიმართან არ იქნება დაშვებული, ესენი არიან ნებისმიერი სტატუსის მქონე პირები, ვინც არ უნდა იყვნენ. ჩვენ ვართ განსაკუთრებულ პირობებში და ყურადღებაც და კონტროლიც არის განსაკუთრებული,“-განაცხადა თეა წულუკიანმა.