ფოთში, დღეის მდგომარეობით, თვითიზოლაციაში 28 ადამიანი იმყოფება, 10 მოქალაქეს კი, თვითიზოლაციის პერიოდი დაუმთავრდა. საზოგადოებრივი ჯანდაცვის ცენტრის ინფორმაციით, საკარანტინო სივრცე დღეს ერთმა ადამიანმა დატოვა.
,,დღეს თვითიზოლაციაში დაგვემატა მხოლოდ ერთი მოქალაქე, ის არის ტრაილერის მძღოლი 45 წლის, აზერბაიჯანიდან ჩამოვიდა. აბსოლუტურად არაფერი არ აღენიშნება, სრულიად ჯანმრთელია. შევამოწმეთ მისი თვითიზოლაციის პირობები და ნორმალურ პირობებშია. ასევე, დღეს თვითიზოლაციის პერიოდი 10 ადამიანს მოეხსნა . საკარანტინო სივრცე კი ერთმა მოქალაქემ დატოვა. საერთო ჯამში ჩვენთან თვითიზოლაციაში 28 ადამიანი იმყოფება, ხოლო კარანტინში - 4. მათი კონტროლი ყოველდღიურად ხორციელდება, უტარდებათ თერმოსკრინინგი და ყველა მათგანი თავს კარგად გრძნობს“, - განაცხადა ფოთის საზოგადოებრივი ჯანდაცვის ცენტრის დირექტორის მოადგილემ, ზინაიდა გაგუამ.