თბილისის სახელმწიფო სამედიცინო უნივერსიტეტის პირველი საუნივერსიტეტო კლინიკის დირექტორის, ლევან რატიანის განცხადებით, ამ ეტაპზე კლინიკაში 77 პაციენტი იმყოფება, საიდანაც 17 მათგანი კორონავირუსითაა ინფიცირებული.

როგორც რატიანმა ჟურნალისტებთან საუბრისას განაცხადა, ბოლო 24 საათის განმავლობაში მათ კლინიკაში კორონავირუსზე არც ერთი დადებითი პასუხი არ მიუღათ.

„ამ ეტაპზე ჩვენს კლინიკაში 77 პაციენტი განაგრძობს მკურნალობას, საიდანაც 17 არის ინფიცირებული. ბოლო 24 საათის განმავლობაში ლუგარის ლაბორატორიიდან არც ერთი დადებითი ტესტი არ მოსულა, რაც გვახარებს და აღნიშნულიდან გამომდინარე, დღეს კიდევ რამდენიმე ათეული პაციენტი დატოვებს კლინიკას, ჩაუტარდებათ კლინიკურ-ლაბორატორიული კვლევები და თუ იქნა ის მომენტი, რომ ჯანმრთელობის საერთაშორისო ორგანიზაციის სტანდარტს შეესაბამება და უნდა დატოვონ ჩვენი დაწესებულება და გადავიდნენ საკარანტინო ზონაში, დღის პირველ ნახევარში, დაახლოებით 30 ასეთი პაციენტი დატოვებს კლინიკას“, - განაცხადა რატიანმა.

ცნობისთვის, ამ დროისთვის საქართველოში კორონავირუსით დაინფიცირების 108 შემთხვევა ფიქსირდება, საიდანაც 21 ადამიანი გამოჯანმთელებულია.