საგუშაგოებზე შემოწმებისას რამდენიმე პირს ტემპერატურა დაუფიქსირდა. მათ მივეცით მითითება, რომ სამედიცინო პუნქტში გაევლოთ შემოწმება,- ამის შესახებ შინაგან საქმეთა სამინისტროს აჭარის პოლიციის დეპარტამენტის დირექტორმა კონსტანტინე ანანიაშვილმა ჟურნალისტებს განუცხადა.
მისი თქმით, აჭარის მასშტაბით სამი ბლოკ-პოსტი და ოთხი დამხმარე საგუშაგოა გახსნილი, სადაც კორონავირუსის გავრცელებასთან დაკავშირებით პრევენციული ღონისძიებები მიმდინარეობს.
"შინაგან საქმეთა სამინისტრო თავდაცვის სამინისტროსთან ერთად აკვირდება საგანგებო მდგომარეობის შესრულების მოთხოვნებს. ვახორციელებთ მონიტორინგს. ასევე საგუშაგოებზე ხორციელდება თერმოსკრინინგი. შემოწმება ხდება მაქსიმალურად ყველა სატრანსპორტო საშუალების, როგორც ვიზუალურად, ასევე თერმოსკრინინგით.
ჯერჯერობით წინააღმდეგობის ფაქტი არ ყოფილა. ყველა მოქალაქე ემორჩილება მოთხოვნებს. რამდენიმე პირი იყო, ვისაც ტემპერატურა აღენიშნებოდა. მათ მიეცათ მითითება, რომ სამედიცინო პუნქტში გაევლოთ შემოწმება," - განაცხადა კონსტანტინე ანანიაშვილმა.
ცნობისთვის, აჭარაში კორონავირუსით 8 ადამიანია ინფიცირებული.