მარნეულის მერის, ზაურ დარგალის ინფორმაციით, 15 ადამიანიდან, რომელთა პასუხებსაც კორონავირუსთან დაკავშირებით ელოდებოდნენ, ორს დადებითი პასუხი დაუფიქსირდა. რაც შეეხება თერმოსკრინინგს, მისი თქმით, 2000 შემოწმებული ადამიანიდან ტემპერატურა არც ერთ მათგანს არ დაუფიქსირდა.

„ორს დაუფიქსირდა დადებითი პასუხი, დანარჩენი ყველა არის უარყოფითი. ამ ორიდან ერთი მარნეულიდანაა, მეორე კი - ბოლნისიდან. რაც შეეხება სკრინინგს, თერმოსკრინინგის პროცესი აქტიურად გრძელდება. პირველი საათის მონაცემებით, 2000 ადამიანი გვყავს შემოწმებული და აქედან სიცხე არც ერთს არ დაუფიქსირდა“,-განაცხადა ზაურ დარგალმა.

მარნეულის მერმა ასევე კომენტარი გააკეთა მუნიციპალიტეტში კანონდარღვევებთან დაკავშირებით და აღნიშნა, რომ დღეს კანონდარღვევის ფაქტები ჯერჯერობით არ დაფიქსირებულა.

„ მოქალაქეების ინფორმირება ძალიან აქტიურად მიმდინარეობს. რაც შეეხება ბანკებთან არესებულ რიგებს,იქ ძალიან კარგად ვაკონტროლებთ სიტუაციას. დისტანცია და სხვა შესაბამისი რეკომენდაციები სრულიად დაცულია. მადლობა მინდა გადავუხადო შინაგან საქმეთა სამინისტროს. ისინი სიტუაციას აქტიურად, ადგილზე აკონტროლებენ და გარკვეულად ჩვენი ზედამხედველობის სამსახურიც არის ამ პროცესში ჩართული“,-აღნიშნა დარგალმა.