პოლიტიკური გაერთიანების ,,ლელო საქართველოსთვის’’ ერთ-ერთი ლიდერის, გიგლა მიქაუტაძის განაცხადებით, დისტანციური გაყიდვები არ უნდა შეიზღუდოს.

მისი თქმით, სტანდარტული რეკომენდაციების დაცვის შემთხვევაში, აღნიშნული საქმიანობა საფრთხეს არ წარმოადგენს.

,,გასაგებია მთავრობის გადაწყვეტილება, საგანგებო მდგომარეობის დროს შეზღუდოს მთელი რიგი ეკონომიკური საქმიანობა, თუმცა გაუმართლებელია online-მაღაზიების საქმიანობის აკრძალვა. ყველა კომპანიას, რომელსაც ამის შესაძლებლობა გააჩნია, მომსახურების დისტანციურად გაწევის სრული უფლება უნდა მიეცეს. სტანდარტული რეკომენდაციების დაცვის შემთხვევაში, ასეთი საქმიანობა არ წარმოადგენს საფრთხეს და მისი შეზღუდვა აზრს მოკლებულია.

არ დაგვავიწყდეს, რომ ბიზნესი დღეს იმყოფება ურთულეს მდგომარეობაში და ის არ უნდა შევაფერხოთ გაუაზრებელი გადაწყვეტილებებით. მნიშვნელოვანია ისიც, რომ მოსახლეობასაც ჰქონდეს მთელი რიგი პროდუქტების სახლიდან გაუსვლელად შეძენის შესაძლებლობა და ხელი არ შევუწყოთ შავი ბაზრის შექმნას’’, - განაცხადა გიგლა მიქაუტაძემ, რომლის კომენტარსაც „ლელო საქართველოსთვის“ ავრცელებს.