საქართველოს ენერგეტიკისა და წყალმომარაგების მარეგულირებელი ეროვნული კომისიის (სემეკ) თავმჯდომარის დავით ნარმანიას განცხადებით, სახელმწიფო ბიუჯეტს მოქალაქეებისთვის ელექტროენერგიის, ბუნებრივი აირის და დასუფთავების გადასახადის დაფარვა თვეში 50 მილიონ ლარამდე დაუჯდება.
როგორც ნარმანიამ „პალიტრანიუსის“ გადაცემა „საღამოს ნიუსრუმში“ განაცხადა, დათვლილია ის ხარჯები, რომელსაც სახელმწიფო კომუნალური გადასახადების სუბსიდირებისთვის გაიღებს.
„ რასაკვირველია ეს ყველაფერი დაანგარიშებულია ჩვენი მხრიდან. მნიშვნელოვანია, რომ ელექტროენერგიის ნაწილში მილიონ 200 ათასამდე ოჯახს შეეხება ეს სუბსიდია, რომელსაც სახელმწიფო დააფინანსებს ბიუჯეტიდან და ელექტროენერგიის ნაწილში თვეში ხარჯი იქნება 17 მილიონ ლარამდე, ხოლო რაც შეეხება ბუნებრივი გაზის ნაწილს 670 000-ზე მეტ აბონენტს შეეხება და ჯამში თვეში დაახლოებით 27 მილიონი ლარი დაიხარჯება სახელმწიფო ბიუჯეტიდან,“-განაცხადა ნარმანიამ.
მისივე ინფორმაციით, დამატებით 5-6 მილიონის ხარჯი იქნება ბიუჯეტიდან ყოველთვიურად დასუფთავებისა და წყალმომარაგების გადასახადების კუთხით.
შეგახსენებთ, რომ მთავრობის გადაწყვეტილებით, მოქალაქეებს, რომლებიც 200 კილოვატზე ნაკლებ ელექტროენერგიას და 200 მ3-ზე ნაკლებ ბუნებრივ აირს მოიხმარენ, მარტში, აპრილსა და მაისში კომუნალური გადასახადი სრულად დაუფინანსდებათ.