შეშფოთების საფუძველი ჩვენ უკვე დიდი ხანია გვაქვს მთელ დედამიწაზე, - ასე უპასუხა დაავადებათა კონტროლისა და საზოგადოებრივი ჯანდაცვის ეროვნული ცენტრის დირექტორის მოადგილემ პაატა იმნაძემ „ინტერპრესნიუსის" კითხვას, რამდენად იძლევა შეშფოთების საფუძველს ის დინამიკა, რომ საქართველოში ბოლო 24 საათში კორონავირუსით ინფიცირების 10 შემთხვევა დაფიქსირდა.

მისი თქმით, "შეშფოთების საფუძვლის გამო გამოცხადდა ქვეყანაში საგანგებო მდგომარეობა და გამკაცრდა ზომები".

„მოდი, პიკურ პერიოდზე ვილაპარაკოთ მას შემდეგ, რაც გვექნება დინამიკის შეფასების საშუალება მომდევნო ორი კვირის განმავლობაში. ამის შემდეგ გვექნება ამაზე საუბარი. რაც შეეხება შეშფოთების საფუძველს, ჩვენ უკვე გვაქვს დიდი ხანია მთელ დედამიწაზე ხომ?! შეშფოთების საფუძველი რომ იყო, ამიტომ გამოცხადდა ქვეყანაში საგანგებო მდოგმარეობა, ამიტომ გამკაცრდა ზომები, ეს ყველაფერი კეთდება იმიტომ, რომ შეშფოთების საფუძველი ნაკლები იყოს ხოლმე," - განაცხადა იმნაძემ.