ბორჯომის მუნიციპალიტეტის მერიის ინიციატივით, ბორჯომის ქუჩებში რეცხვა-დეზინფექციის სამუშაოები ყოველდღიურად მიმდინარეობს. ამის შესახებ „ინტერპრესნიუსს“ ბორჯომის მუნიციპალიტეტის მერიიდან აცნობეს.

მათივე ინფორმაციით, სპეციალური ხსნარებით ირეცხება საავტომობილო გზები, საფეხმავლო ბილიკები, ასევე სასურსათო მარკეტების, ბანკების, ბენზინგასამართი სადგურების, სამედიცინო დაწესებულების მიმდებარე ტერიტორიები. დეზინფექცია უტარდება მრავალბინიან საცხოვრებელ სახლებს და მათ გარე სივრცეებს.

„სულ ცოტა ხნის წინ სკვერების, სპორტული მოედნების, ტრენაჟორების, სანაგვე ურნების დეზინფექცია ჩატარდა დაბა ბაკურიანში და დაბა ახალდაბაში.

აღნიშნული ღონისძიებების გარდა, ქალაქის უბნებში დასუფთავების მასშტაბური სამუშაოები გრძელდება.

ქუჩები იწმინდება ზამთარში დაგროვილი ქვა-ღორღისაგან, სუფთავდება სანიაღვრეები და საყოფაცხოვრებო ნარჩენებისაგან განსაკუთრებულად დანაგვიანებული ტერიტორიები.

ღონისძიებებში აქტიურად არიან ჩართულები ა(ა)იპ სამსახურები“, - ნათქვამია მუნიციპალიტეტის მიერ გავრცელებულ ინფორმაციაში.