„ევროპული საქართველოს“ ლიდერი დავით ბაქრაძე „ქართული ოცნების“ ინიციატივას ეხმიანება და აცხადებს, რომ „ევროპული საქართველო“ უკვე სამი კვირაა 350 გაჭირვებულ ოჯახს ეხმარება და მარტოხელა მოხუცებთან მათ მოხალისეებს საკვები პროდუქტები მიაქვს. მისივე თქმით, ამას პარტია ზედმეტი ხმაურის გარეშე აკეთებდა.
"მინდა, გამოვეხმაურო პარტია „ქართული ოცნების“ ინიციატივას, პარლამენტის წევრების მხრიდან საკუთარი ხელფასის მესამედის კორონავირუსის დახმარების ფონდში გადარიცხვის თაობაზე. რა თქმა უნდა, ასეთ სიტუაციაში, როცა ვირუსი საფრთხეს უქმნის ჩვენი მოქალაქეების სიცოცხლეს და ჯანმრთელობას, როცა ვირუსი ემუქრება ათასობით ადამიანის სამუშაო ადგილს და მათი ოჯახების შემოსავალს, როგორც არასდროს მნიშვნელოვანია ქველმოქმედებაც და მნიშვნელოვანია საზოგადოების ერთიანობის და საზოგადოებრივი სოციალური სოლიდარობის ჩვენებაც. სწორედ ამიტომ, უკვე სამი კვირაა პარტია „ევროპული საქართველო“ ეხმარება 350 გაჭირვებულ ოჯახს. ეს გახლავთ ოჯახები, რომლებშიც ცხოვრობენ მარტოხელა მოხუცებულები, ადამიანები, ვისაც არ შეუძლიათ ქუჩაში გასვლა და არ აქვთ სახსრები, შეიძინონ პროდუქტი და პირველადი მოხმარების ნივთები. უკვე სამი კვირაა "ევროპული საქართველოს" მოხალისეებს, რომლებმაც ლუგარის ცენტრში გაიარეს შესაბამისი მომზადება და ტრენინგი, ოჯახებში მიაქვთ ამ ადამიანებთან საკვები და პირველადი მოხმარების ნივთები. ამ დახმარების ფასი ყოველკვირეულად გახლავთ დაახლოებით 10-12 000 ლარი და ეს არის თანხა, რომელსაც პარლამენტის წევრები „ევროპული საქართველოდან“ საკუთარი ხელფასით ფარავენ. ჩვენ ამას ვაკეთებდით და გავაგრძელებთ მომავალშიც ამ ადამიანების დახმარებას, ოღონდ ამას ვაკეთებდით და მომავალშიც გავაკეთებთ ზედმეტი პიარის და საჯაროობის გარეშე. ჩვენ კრიზისის ამოწურვამდე აუცილებლად დავეხმარებით 350 ოჯახს ჩვენი სახსრებით, ჩვენი ნაყიდი პროდუქტებით, ჩვენი მოხალისეებით, მათ შორის პარლამენტის წევრებით, რომლებიც დადიან და დავდივართ მოხალისეებად ოჯახებში“, -განაცხადა დავით ბაქრაძემ.