ბოლნისის მერი - სოფელ ქვემო ბოლნისში ადგილობრივებს პენსია დაურიგდა - მოხალისეები სოციალური დისტანციის დაცვას უზრუნველყოფდნენ
კორონავირუსის პრევენციის მიზნით, სოფელი ქვემო ბოლნისი მკაცრ საკარანტინო ზონად გამოცხადდა. ადგილობრივებისთვის პენსიების დასარიგებლად სოფელში დღეს „ლიბერთი ბანკის“ ავტომანქანა შევიდა,- ამის შესახებ „ინტერპრესნიუსს” ბოლნისის მუნიციპლიტეტის მერიიდან აცნობეს.
მათივე ცნობით, პენსიების დარიგების პროცესში სოციალური დისტანციის დაცვა სამართალდამცველებმა და მოხალისეთა ჯგუფებმა უზრუნველყო. ადგილზე იმყოფებოდა ბოლნისის მუნიციპალიტეტის მერი დავით შერაზადიშვილი.
„დღეს სოფელ ქვემო ბოლნისის მცხოვრებლებს პენსები დაურიგდათ. მოხალისეები სოციალური დისტანციის დაცვას აქტიურად უზრუნველყოფდნენ. სოფელში დისტრიბუცია მუშაობს ჩვეულებრივად, შეკვეთის შემდეგ მოდის მანქანა და მაღაზიებში პროდუქტების განაწილება ხდება. ბოლნისის მუნიციპალიტეტის მერიამ ქვემო ბოლნისში 100 სასურსათო პაკეტი უკვე დაარიგა. სხვა მხრივ, აქ სიმშვიდეა. მოსახლეობა მაქსიმალურად ინფორმირებულია კარანტინით დაწესებული შეზღუდვების შესახებ“, – განაცხადა ბოლნისის მუნიციპალიტეტის მერმა დავით შერაზადიშვილმა.
