აჭარის ავტონომიური რესპუბლიკის საკანონმდებლო და აღმასრულებელი ხელისუფლების წარმომადგენლები კორონავირუსთან ბრძოლის სოლიდარობის აქციას უერთდებიან. აღნიშნულის შესახებ განცხადება აჭარის უმაღლესი საბჭოსა და მთავრობის თავმჯდომარეებმა, დავით გაბაიძემ და თორნიკე რიჟვაძემ გააკეთეს.

დავით გაბაიძემ მადლობა გადაუხადა ქართველ მედიკოსებსა და ყველა იმ უწყების წარმომადგენელს, ვინც დღეს აქტიურადაა ჩართული კორონავირუსის საწინააღმდეგო ბრძოლაში.

„აჭარის უმაღლესი საბჭოს უმრავლესობა უერთდება სოლიდარობის აქციას და მზად ვართ, სამი თვის განმავლობაში ჩვენი ხელფასების მესამედი გადავრიცხოთ სოლიდარობის ფონდში“, - აღნიშნა დავით გაბაიძემ, რომლის კომენტარსაც აჭარის უმაღლესი საბჭო ავრცელებს.