ზოგიერთი დასავლელი ქვეყანა, ასევე საქართველო და უკრაინა, რომლებმაც გაერო-ს გენერალურ ასამბლეაზე დაბლოკეს რუსეთის მხარის მიერ მომზადებული რეზოლუცია პანდემიის პერიოდში სანქციებზე უარის შესახებ, ჯანსაღ აზრს დაუპირისპირდნენ - ჭარბობდა ეგოისტური ბლოკური აზროვნება. ამის შესახებ რუსეთის ფედერაციის საბჭოს საერთაშორისო საკითხთა კომიტეტის თავმჯდომარემ კონსტანტინ კოსაჩოვმა „ფეისბუკის“ გვერდზე დაწერა.
„როგორც ჩანს, დასავლეთის ქვეყნებმა საკუთარი თავი გარიყულად აქციეს მიუხედავად იმისა, რომ მიჩვეულნი იყვნენ პირიქით, ელაპარაკათ საერთაშორისო საზოგადოების სახელით. თუმცა, იმ სიტუაციაში, როდესაც საჭირო იყო ჰუმანიზმის გამოვლენა და გაცილებით სუსტების დახმარება, ეგოისტურმა ბლოკურმა აზროვნებამ იჭარბა“ , - წერს კოსაჩოვი.
რუსეთის ფედერალური საბჭოს წევრი დარწმუნებულია, რომ ასეთი ქცევა აშკარა დადასტურებაა იმისა, რომ დასავლეთმა, პირველ რიგში, მორალური ლიდერობა დაკარგა მსოფლიოში.
„ამასთან, თუკი აშშ-ში სანქციებმა საბოლოოდ შეცვალა საგარეო პოლიტიკა, ხოლო უკრაინასა და საქართველოსთვის ანტირუსული ზომები გახდა ეროვნული იდეების სუროგატი, ევროკავშირის ქვეყნებისთვის ამერიკის პოზიციის ბრმად მხარდაჭერა - კიდევ ერთი დარტყმაა მის საერთაშორისო სუბიექტურობასა და ავტორიტეტზე“ , - აცხადებს კოსაჩოვი.