იმერეთში სახელმწიფო რწმუნებული ზვიად შალამბერიძე მიესალმება “ქართული ოცნების“ ინიციატივას ხელფასის ერთი მესამედის StopCov ფონდში გადარიცხვის შესახებ და აცხადებს, რომ აღნიშნულ ინიციატივას თავადაც უერთდება. როგორც მან განაცხადა, ამ დროს მნიშვნელოვანია იმ მოქალაქეებზე ფიქრი, ვინც შექმნილი ვითარების გამო შემოსავლის გარეშე დარჩა.
„ასეთ დროს, როდესაც არა მარტო საქართველო, მსოფლიო აღმოჩნდა მოულოდნელი საფრთხის წინაშე, მთავარი საზრუნავი ადამიანის ჯანმრთელობას და სიცოცხლესთან ერთად, იმ მოქალაქეებზე ფიქრია, ვინც შექმნილი ვითარების გამო შემოსავალის გარეშე რჩება. ძალიან დროული და მისასალმებელია "ქართული ოცნების" ინიციატივა ხელფასის ერთი მესამედის StopCov ფონდში გადარიცხვის შესახებ და რა თქმა უნდა, დიდი სიამოვნებით ვუერთდები. ვფიქრობ, არც ერთი თანამდებობის პირი ვერ და არ იქნება გულგრილი იმის მიმართ, რომ ჩვენი მოქალაქეები დარჩნენ უსამსახუროდ და ყოველდღიურობაზე ამ კუთხით პრობლემები შეექმნათ. რა თქმა უნდა, ყველაფერს გავაკეთებთ, რომ ამ ადამიანებს დავუდგეთ გვერდით და იმედი მაქვს, "ქართული ოცნების" ამ ინიციატივას კიდევ ბევრი მხარდამჭერი გამოუჩნდება“, - აცხადებს შალამბერიძე, რომლის კომენტარსაც იმერეთში სახელმწიფო რწმუნებულის პრესსამსახური ავრცელებს.