საჩხერის მერს, რომლის მეუღლესაც კორონავირუსი დაუდასტურდა, 80-ზე მეტ მოხუცებულთან ჰქონდა შეხება, რომელთაც საკვები პროდუქტები დაურიგდა. ამის შესახებ საჩხერის მერის მოადგილემ ოთარ ომიაძემ განაცხადა. თუმცა, როგორც ის აღნიშნავს, მერიის მიერ მოხუცებისთვის პროდუქტების დარიგება ყველა წესის დაცვით ხდებოდა.

„მერია დიდი ხანია დისტანციურ მუშაობაზეა გადასული, თუმცა რამდენიმე დღის წინ მერი თანამშრომლებთან ერთად საქველმოქმედო აქციაში მონაწილეობდა. პროდუქტები წესების სრული დაცვით დარიგდა და საფრთხე არავის ემუქრება“, - განმარტავს ოთარ ომიაძე.

ამ ეტაპზე მერიაში ლუგარის ლაბორატორიის პასუხს ელოდებიან. ოთარ ომიაძის განცხადებით, თუ მერის მეუღლეს განმეორებითი ტესტით კორონავირუსი დაუდასტურდა, შესაბამის ზომებს მიიღებენ და კონტროლი გამკაცრდება.

მისი თქმით, თანამშრომლების უმეტესობა, იზოლაციაშია, ასევე ყოველდღიურად ხდება მერიის შენობის დეზინფექცია.