სასწრაფო დახმარების ჯგუფი, რომელმაც ქუთაისში კორონავირუსით დაინფიცირებული 67 წლის პაციენტი ცხელების ცენტრში გადაიყვანა, თვითიზოლაციაში იმყოფება. მათ ამ დროისთვის ვირუსის სიმპტომები არ აქვთ, თუმცა დაკვირვება მიმდინარეობს.
67 წლის მამაკაცი ცენტრში ორი დღის წინ ტემპერატურით შეიყვანეს და კორონავირუსი გუშინ დაუდასტურდა, რის შემდეგაც, მამაკაცი ინფექციურ საავადმყოფოში შეიყვანეს.
არსებული ინფორმაციით, ინფექციურ საავადმყოფოში მოთავსებულია მისი მეუღლეც. პაციენტს ანალიზი აუღეს და გადაგზავნილია ქუთაისის ლაბორატორიაში, პასუხი კი დღის ბოლომდე გახდება ცნობილი.
ეპიდემიოლოგები მამაკაცის კონტაქტებს სწავლობენ, რადგან მისი დაინფიცირების პირველწყარო უცნობია. მას საზღვარგარეთ მოგზაურობის ისტორია არ აქვს, შესაბამისად არც თვითიზოლაციაში იმყოფებოდა, თუმცა დაავადებათა კონტროლის იმერეთის სამმართველოში აცხადებენ, რომ მისი კონტაქტები არც ისე ფართოა. პაციენტი წყალტუბოს მუნიციპალიტეტის სოფელ ფარცხანაყანევიდანაა. ადგილზე ეპიდემიოლოგები მუშაობენ.