ქუთაისის მერი გიორგი ჭიღვარია, საკრებულოს თავმჯდომარის მოვალეობის შემსრულებელი ირაკლი შენგელია, მერიისა და საკრებულოს პოლიტიკური თანამდებობის პირები უერთდებიან პარტია „ქართული ოცნება - დემოკრატიული საქართველოს“ მიერ მიღებულ გადაწყვეტილებას, რომ მომდევნო სამი თვის განმავლობაში, სახელისუფლებო გუნდის თანამდებობის პირებმა კორონავირუსთან ბრძოლის ფონდში ხელფასის ერთი მესამედი გადარიცხონ. აღნიშნულის შესახებ „ინტერპრესნიუსს“ ქუთაისის მერიიდან ცნობეს.
„რთული ვითარებაა ქვეყანაში და ჩვენ, ხელისუფლების წარმომადგენლებმა, გარდა იმისა, რომ მაქსიმალურად ეფექტურად შევასრულოთ ჩვენზე დაკისრებული მოვალეობები, დამატებითი წვლილიც უნდა შევიტანოთ covid19-თან ბრძოლის საქმეში.
ვუერთდები „ქართული ოცნების“ მიერ დაწყებულ სოლიდარობის აქციას და მომდევნო სამი თვის მანძილზე ჩემი ხელფასის 1/3-ს გადავრიცხავ StopCoV ფონდში. იგივეს გააკეთებენ ქუთაისის მუნიციპალიტეტის მერიისა და საკრებულოს პოლიტიკური თანამდებობის პირები.
მჯერა, რომ ჩვენი თანამოქალაქეების მიმართ სოლიდარობის გამოხატვის ეს ფორმა, მთვარობის მიერ გატარებულ უამრავ სასიცოცხლოდ მნიშვნელოვან ღონისძიებასთან ერთად, დადებით როლს შეასრულებს პანდემიასთან გამართულ ბრძოლაში და ამ აქციას, მატერიალურთან ერთად, უდიდესი მორალური ღირებულებაც ექნება!“ - აცხადებს ქუთაისის მერი გიორგი ჭიღვარია.