რუსეთის მართლმადიდებელ ეკლესიაში უკმაყოფილება გამოთქვეს გავრცელებული ინფორმაციის გამო, რომლის მიხედვითაც, მოსკოვში, კვირას, მრევლის წევრები ეკლესიაში ყოფნისთვის, აკრძალვის ამოქმედებამადე ერთი დღით ადრე, დააჯარიმეს. ამის შესახებ სოციალურ ქსელში მოსკოვის საპატრიარქოს ეკლესიისა და საზოგადოების ურთიერთობის საკითხებში სინოდალური განყოფილების ხელმძღვანელი ვლადიმერ ლეგოიდა წერს.

საპატრიარქოს წარმომადგენელი აღნიშნავს, რომ ეს ინფორმაცია თუ დადასტურდა, სერიოზულ კითხვებს გამოიწვევს.

მისი თქმით, მთავარი სანიტარული ექიმის მითითება ღვთისმსახურების მრევლის გარეშე ჩატარების შესახებ ძალაში მხოლოდ 13 აპრილიდან შედის.

შაბათს, რუსეთის საპატრიარქომ, ქვეყნის მთავარი სანიტარული ექიმის მოთხოვნით, მოსკოვისა და მოსკოვის ოლქის სასულიერო პირებს ურჩია, 13-დან 19 აპრილამდე ღვთისმსახურებები მრევლის დაუსწრებლად ჩაატარონ. მსახურებებზე დასწრება სასულიერო პირებთან ერთად შეეძლებათ პირებს, რომელთა დასწრება აუცილებელია ღვთისმსახურებისა და საკულტო შენობების ფუნქციონირებისთვის, ასევე მათთვის, ვინც უნდა განახორციელოს საღვთისმსახური პირდაპირი ეთერის ტრანსლირება.