ირაკლი სესიაშვილი - ხელისუფლებამ ძალიან მჭიდრო კომუნიკაცია აწარმოა საპატრიარქოსთან და მათ შორის მიღწეული შეთანხმება არის „ოქროს შუალედი“

თავდაცვისა და უშიშროების კომიტეტის თავმჯდომარე ირაკლი სესიაშვილი მიიჩნევს, რომ საპატრიარქოსა და ხელისუფლებას შორის მიღწეული შეთანხმება არის „ოქროს შუალედი“, რაც შეიძლებოდა ამ მხრივ გაკეთებულიყო. როგორც დეპუტატი აღნიშნავს, მიუხედავად იმისა, რომ მათ უწევთ მრევლის ინტერესების გათვალისწინებაც, ხელისუფლების წარმომადგენლებს აქვთ ვალდებულება, რომ მოსახლეობას სახლში დარჩენისკენ მოუწოდონ.

„ძალიან ძნელია ეს ვითარება, როცა ქვეყანაში ვებრძვით პანდემიას და სახელმწიფო ცდილობს, თითოეული მოქალაქის ჯანმრთელობა, სიცოცხლე გადაარჩინოს, მეორე მხრივ, გვაქვს უდიდესი სულიერი დღესასწაული - აღდგომა. ტრადიციულად, საქართველოს მოსახლეობისთვის ეს არის ერთ-ერთი ყველაზე ბრწყინვალე დღესასწაული, ამიტომ მიუხედავად იმისა, რომ ხელისუფლებამ ძალიან მკაფიოდ და პრინციპულად თქვა, რომ ყველა შესაბამისი რეკომენდაცია, წესი უნდა იყოს დაცული, სამწუხაროდ, გვიწევს მათ შორის, ჩვენი დედა ეკლესიის მრევლის ინტერესების გათვალისწინება. ყველაზე სწორი იყო ის, რომ ხელისუფლებამ ძალიან მჭიდრო კომუნიკაცია აწარმოა საპატრიარქოსთან და ის შეთანხმება, რაც არის მიღწეული, ვფიქრობ, მეტ-ნაკლებად არის ოქროს შუალედი. თუმცა ჩვენ, ხელისუფლების წარმომადგენლებს, გვაქვს ჩვენი ვალდებულება, რომ მოვუწოდოთ თითოეული მოქალაქეს, დარჩნენ სახლში, ამ პანდემიის საფრთხეები ძალიან სერიოზულია, რაზეც ჩვენმა ღირსეულმა ეპიდემიოლოგებმა გუშინაც, დღესაც ძალიან მკაფიოდ ისაუბრეს. ამიტომ ჩვენ კიდევ ერთხელ ყველას მოვუწოდებთ, რომ დარჩნენ სახლში და მაქსიმალურად დაიცვან ის წესები და რეკომენდაიცები, რასაც მედიკოსები და ხლეისუფლება გვთავაზობენ,“- განაცხადა ირაკლი სესიაშვილმა.