რაჭა-ლეჩხუმისა და ქვემო სვანეთის სახელმწიფო რწმუნებულის, არჩილ ჯაფარიძის განცხადებით, რეგიონში მშვიდი ვითარებაა და მოქალაქეები სასაფლაოზე გასვლისგან მაქსიმალურად იკავებენ თავს.

„აბსოლუტურად მშვიდი ვითარებაა. გუშინ ტაძრებში ხალხის სიმრავლე არ შეინიშნებოდა. სასაფლაოებზეც არ გადის ხალხი, მაქსიმალურად თავს იკავებენ, ყველა რეკომენდაციას მეტ-ნაკლებად ასრულებენ. ჯერ არ დაფიქსირებულა თავშეყრის ან სასაფლაოზე სუფრის გაშლის ფაქტი, მშვიდი ვითარებაა“, - აცხადებს არჩილ ჯაფარიძე „ინტერპრესნიუსთან“ საუბრისას.

მისივე თქმით, რეგიონში არანაირი დეფიციტი არ არის, არც სურსათის და არც მედიკამენტების კუთხით, მომარაგება ჩვეულებრივ რეჟიმში ხდება.

რაც შეეხება თვითიზოლაციაში მყოფ პირებს, როგორც არჩილ ჯაფარიძე „ინტერპრესნიუსთან" საუბრისას აცხადებს, ბოლო დღეებში კორონავირუსის სიმპტომები არავის გამოვლენია.

მისივე თქმით, ცაგერში თვითიზოლაცია ყველა პირს უკვე მოეხსნა, რაც შეეხება ლენტეხს, თვითიზოლაციაში 41 პირი რჩება, რომელთა თვითიზოლაციის ვადა 23 აპრილს გადის.

იხილეთ ვიდეო: რაჭა-ლეჩხუმში მშვიდი ვითარებაა - ტაძრებში ხალხის სიმრავლე არ შეინიშნებოდა, სასაფლაოებზეც არ გადიან - გუბერნატორი