იმ პირების მიმართ, რომლებმაც საგანგებო რეჟიმი ან კარანტინის და იზოლაციის წესი დაარღვიეს, არანაირი ამნისტიის გამოცემა დღის წესრიგში არ დგას,- ამის შესახებ იურიდიულ საკითხთა კომიტეტის თავმჯდომარემ ანრი ოხანაშვილმა განაცხადა. მისივე თქმით, საგანგებო მდგომარეობის და საკარანტინე წესების დარღვევისთვის დაწესებული სანქციების მიზანი მოქალაქეების სიცოცხლესა და ჯანმრთელობაზე ზრუნვაა.

„თუკი ვინმე არ დაიცავს წესს, თუკი ვინმე არის ინფიცირებული ან ჰქონდა შეხება ინფიცირებულთან და წესს არ იცავს, არ აცნობებს ამის შესახებ შესაბამის ორგანოს, არ ახდენს თვითიზოლაციას, ეს ზრდის სხვა მოქალაქეების დაინფიცირების საშიშროებას. ამიტომ თუ ოპოზიცია იმას გვეუბნება, რომ რომ ჩვენ პასუხი არ უნდა მოვთხოვოთ მათ, ვინც ჩვენი მოქალაქეების სიცოცხლეს და ჯანმრთელობას საფრთხეს შეუქმნიან, ეს მათი უპასუხიმსგებლო განცხადებაა. ჩვენი ვალდებულებაა მოსახლეობის სიცოცხლესა და ჯანმრთელობაზე ზრუნვა. რაც შეეხება ამნისტიის საკითხს, არ დგას დღის წესრიგში არანაირი ამნისტიის გამოცემა იმ პირების მიერ ჩადენილი ქმედებიბისთვის, რომლებმაც დაარღვიეს საგანგებო ან საომარი რეჟიმი, ან კარანტინის და იზოლაციის წესი საგანგებო და საომარი რეჟმის დროს და ამით საფრთხე შეუქმნეს ჩვენი მოქალაქეების სიცოცხლეს და ჯანმრთელობას. აღნიშნული საკითხი, რა თქმა უნდა, პარლამენტის პრეროგატივაა, მაგრამ არანაირი ამნისტია ამ ეტაპზე არ განიხილება,“- განაცხადა ოხანაშვილმა.