იმერეთში სახელმწიფო რწმუნებულის, ზვიად შალამბერიძის განცხადებით, სოფელ ღვანკითში, რომელიც კორონავირუსის გავრცელების გამო ჩაკეტილია, ახალი შემთხვევა არ გამოვლენილა.
როგორც „ინტერპრესნიუსთან“ საუბარში შალამბერიძე განმარტავს, დღეს, ეპიდემიოლოგები დაახლოებით, 8 ადამიანს აუღებენ ნიმუშებს. რაც შეეხება მთლიან იმერეთს, რწმუნებულის თქმითვე, ვითარება მშვიდია და ახალი შემთხევებიც არ დაფიქსირებულა.
„მთლიან იმერეთში ინფიცირებულების ახალი შემთხვევები არ გვაქვს, შეიძლება ითქვას, რომ ყველაფერი მშვიდ ვითარებაში მიმდინარეობს. რაც შეეხება ღვანკითს, გუშინ, მთელი სოფლის თერმოსკრინინგი დავამთავრეთ. გუშინვე იყო 18 ნიმუში აღებული, ყველა მათგანზე პასუხი უარყოფითი მოვიდა და შესაბამისად, ღვანკითში ახალი შემთხვევები ჯერჯერობით არ გვაქვს. ეპიდემიოლოგებმა დღესაც უნდა აიღონ რამდენიმე ნიმუში და შევხედავთ, რა სიტუაცია იქნება. კონტაქტები გამოვლენილია და ანალიზებს სწორედ მათ ვუღებთ, ვინაიდან სოფელი ჩაკეტილია, ყველა ხელმისაწვდომია და ყველასთან იმ დღესვე ხდება ანალიზის აღება“, - განაცხადა რწმუნებულმა.
შეგახსენებთ, რომ თერჯოლის რაიონის სოფელი ღვანკითი რამდენიმე დღის წინ, კორონავირუსის შემთხვევის დაფიქსირების გამო ჩაიკეტა. ამ დროისთვის სოფელში ვირუსი 12 პირს აქვს დადასტურებული.