მარნეულის მერის ზაურ დარგალის განცხადებით, პროდუქცია, რომლის სარეალიზაციოდ გატანასაც მოსახლეობა ითხოვდა, უკვე მთლიანადაა გატანილი.

ამასთან, როგორც დარგალი „ინტერპრესნიუსთან“ საუბარში განმარტავს, მარნეულში ბოლო 8 დღის განმავლობაში, კორონავირუსის ახალი შემთხვევა არ გამოვლენილა.

„დღესაც, მარნეულში კორონავირუსის არცერთი ფაქტი არ დადასტურებულა, აღებული 6 ანალიზიდან ყველას პასუხი უარყოფითი მოვიდა. საერთო ჯამში, მარნეულში, უკვე მე-8 დღეა, რაც კორონავირუსით დაინფიცირების ახალი ფაქტი არ დადასტურებულა. რაც შეეხება, სასოფლო პროდუქციის გატანას, ის პროდუქტი, რაც მოსახლეობას ჰქონდა, ყველაფერი გავიტანეთ. ახლაც სოფლებში დავდივართ და ადგილობრივ მოსახლეობას აქტიურად ვეხმარებით. ჩვენთვის მნიშვნელოვანია, რომ მოსახლეობის ზარალი მინიმუმი იყოს“, - განაცხადა დარგალმა.