ვეტერანების საქმეთა სახელმწიფო სამსახური კორონავირუსის ეპიდემიის გამო საქართველოში გამოცხადებული საგანგებო მდგომარეობის დროსაც აგრძელებს შეჭირვებულ ბენეფიციართა დახმარებას და ვეტერანთა თანადგომის აქციებს მთელი ქვეყნის მასშტაბით ატარებს. ამის შესახებ „ინტერპრესნიუსს“ ვეტერანების საქმეთა სახელმწიფო სამსახურიდან აცნობეს.
მათივე ინფორმაციით, უწყებამ ბენეფიციართათვის თანადგომის მორიგი აქცია ჩაატარა.
„აქცია ამჯერად, მცხეთა-მთიანეთის რეგიონის ( მცხეთის, დუშეთის, თიანეთის, სტეფანწმინდის) მუნიციპალიტეტებში მცხოვრები და წეროვანში, ახალგორიდან დევნილი, უკიდურესად შეჭირვებული, მკვეთრად გამოხატული შშმ, მრავალშვილიანი, მარტოხელა და COVID 19-ის გამო, განსაკუთრებული რისკის ქვეშ მყოფი, მხცოვანი ომისა და თავდაცვის ძალების ვეტერანებისთვის ჩატარდა. სამსახურის რეგიონული მართვის დეპარტამენტის მცხეთა-მთიანეთის სამმართველოს წარმომადგენლებმა მათ სასურსათო კალათები გადასცეს.
ვეტერანების საქმეთა სახელმწიფო სამსახური, ვეტერანთა თანადგომის აქციებს, მთელი საქართველოს მასშტაბით, კვლავ გააგრძელებს“, - აღნიშნულია ინფორმაციაში.