საქართველოს ხელისუფლება უცხოეთში მყოფი საქართველოს მოქალაქეების სამშობლოში ეტაპობრივი დაბრუნების პროცესს განაგრძობს. ამის შესახებ „ინტერპრესნიუსს“ ტურიზმის ეროვნული ადმინისტაციიდან აცნობეს.
მათივე ინფორმაციით, ბათუმის საერთაშორისო აეროპორტში პოლონეთის დედაქალაქ ვარშავადან სპეცრეისი განხორციელდა, რომლითაც სამშობლოში 179 ადამიანი დაბრუნდა. მათ აეროპორტშივე გაიარეს სამედიცინო შემოწმება, და სპეციალურად მათთვის გამოყოფილი ავტობუსებით სასტუმრო „ეიფორიაში“ გახსნილ საკარანტინო ზონაში განთავსდნენ. 14-დღიანი კარანტინის დროს უცხოეთიდან დაბრუნებული მოქალაქეები 24-საათიანი სამედიცინო მეთვალყურეობის ქვეშ იქნებიან.
„საპრევენციო ღონისძიებების ფარგლებში, მთავრობის საკოორდინაციო საბჭოს გადაწყვეტილებითა და მთავრობის დადგენილებით, ეკონომიკის სამინისტროს ტურიზმის ეროვნულმა ადმინისტრაციიის ორგანიზებით საქართველოს მასშტაბით საკარანტინო სივრცე ამ დროისთვის 83 სასტუმროში მოქმედებს. ამჟამად კარანტინში 4889 ადამიანი იმყოფება. საკარანტინო სივრცეებში არსებული განთავსების პირობები სრულ შესაბამისობაშია საერთაშორისო ჯანდაცვის ორგანიზაციისა და ეროვნული კანონმდებლობით გათვალისწინებულ ნორმებთან საკარანტინო სივრცეების მოწყობის შესახებ,“ - ნათქვამია ინფორმაციაში.