აჭარის უმაღლესი საბჭოს ჯანმრთელობის დაცვისა და სოციალური საკითხთა კომიტეტის სხდომაზე აჭარის რესპუბლიკურ ბიუჯეტში შესატან ცვლილებებზე იმსჯელეს. ამის შესახებ „ინტერპრესნიუსს“ აჭარის უმაღლესი საბჭოდან აცნობეს.
მათივე ინფორმაციით, კომიტეტის თავმჯდომარის, ნუგზარ სურმანიძის განცხადებით, პანდემიისა და მისგან გამოწვეული გართულებებისგან მოსახლეობის მაქსიმალური დაცვა ხელისუფლების უმთავრესი მიზანია, რაც შესაბამისად ბიუჯეტშიც აისახა.
კანონის პროექტი „აჭარის ავტონომიური რესპუბლიკის 2020 წლის რესპუბლიკური ბიუჯეტის შესახებ“ აჭარის ავტონომიური რესპუბლიკის კანონში ცვლილების შეტანის თაობაზე კომიტეტის წევრებს ფინანსთა და ეკონომიკის მინისტრმა ჯაბა ფუტკარაძემ წარუდგინა.
აჭარის უმაღლესი საბჭოს ინფორმაციით, მინისტრმა დეტალურად ისაუბრა კანონის პროექტით გათვალისწინებულ პროგრამებზე და უპასუხა კანონმდებელთა კითხვებს. კომიტეტმა პროექტის პლენარულ სხდომაზე გატანას მხარი დაუჭირა.